الثلاثاء

تسمحولي

تسمحولي اغير حكاية الصور وبس , لاني نفسي اليومين دول اتكلم شوية 
بصراحه بقالي فترة  متغير شوية وده لاني عرفت نوع جديد من الحياة , حياة عمري ما عشتها قبل كدا وطبعاً كلمكم خمنتوا ان السبب في التغيير ده واحده 
اقولكم طبعاً اكيد واحده امال حتبقي ايه!! , هوا مافيش بينا قصة حب ولاحاجه علشان محدش يفهم غلط ولاهي قالتلي بحبك ولا انا قولتلها بحبك بس بينا حاجات كتير اوي كصداقة مش اكتر لحد دلوقتي , يعني بنحب نكلم بعض ونضحك مع بعض وكل واحد فينا بيوصف التاني بكلام لو اتنين بيحبوا بعض مش حيقولوه لبعض ويمكن انا اكتر لاني بصراحه عمري ماشوفت واحده كدا خالص .... حتقولولي الزاي ... حقولكم
عليها صوت رهيب ياما رهيب قمة الرقه في صوتها لدرجة اني بحس نفسي انها بتستعمل معايا التنويم المغناطيسي وعلي فكرة هيا كانت عايزة تبقي مذيعة فعاملة تسجيلات صوتية وانا طبعا عندي التسجيلات دي وبشغلها علي طول وبنام عليها , ضحكتها ....حكاية حكاية والله لدرجة اني بفرح اكتر مابفرح اما الزمالك يجيب جون (طبعا لاني مشجع زملكاوي واكيد طبعا فهمتوا انا اد ايه بفرح بجون للزمالك) وعمري ماكنت افتكر ان فيه حاجه تفرحني اكتر من جون للزمالك ده غير اني بحس ان ضحكتها دي ضحكه مش عادية لا بحسها قنبلة نووية انفجرت فيا , طبعاً ده غير انها قمر بجد والله جدا (يمكن انا شايفها كدا) بس والله هيا قمر بجد وهاتوا مصحف وانا احلفلكم عليه
حد  يقولي هيا دي مشكلة ولاحاجه كويسه ولا ايه .....
رأيي لله ياولاد الحلال 




15 التعليقات:

somia'amin يقول...

دا اجمل شئ انت مش فى مشكلة ولا حاجة انت بس بتعشقها وخلى بالك بتعشقها معبرة اكتر من بتحبها وحتى لو هى عادية انت وهى شكلها بتحبك خليك معاها وقولها متضيعش وقت محدش ضامن عمرة وانت يا عينى غرقان فيها

وصف الاحساس يقول...

كل ده ومش بتحبها
امال لو بتحبها كنت قلت ايه
انت خايف تحبها وﻻ خايف تعترف وﻻ خايف تسالها
بيتهيالي ﻻرم تحط شكل العﻻقه دي ايه الصداقه دي مش مفهومه بيتهيالي الوضع اكبر من صداقه ولو صداقه ما تبقاش كده
ربنا يوفقك

غير معرف يقول...

احيانا كتير بنعيش شعور يطيرنا فوق اوي في السما لدرجة اننا مش عارفين احنا بنحلم ولا الي احنا فيه حقيقة واحيانا من كتر محنا مش عارفين نصدق او مستكترين علينا الاحساس دا بنكدب نفسنا ونكمل الحلم

الاحلام الواقعية بتيجي فاجاة زي الجرس بيصحينا من عز النوم وبيفكرنا في لسة ناس تتحب وناس نكمل معاها حياتنا

ربنا ينولك الي في بالك :)

Unknown يقول...

somia'amin

هههههههههه شكلي غرقان بجد وفعلا بعشقها معبرة اكتر وانا بقولها ياريت ماتضيعيش وقت (لوشافت التعليق ده)
شكرا علي رايك وحعمل اللي قولت عليه
تحياتي
محمد عامر

Unknown يقول...

وصف الاحساس

متهيالي ان فيه كلام تاني كتير بس مش عارف اكتب كل حاجه
انا خايف من التلاته مع بعض
بس اعترفلك اني صداقتي بيها حاجه عزيزة عليا جدا وده لاني قريب منها وكدا يعني وبكلمها وبتكلمني .....
يارب ويوفقك ان شاء الله
تحياتي

Unknown يقول...

ايميليا الجنزوري

كلامك مش محتاج تعليق مني , بس بجد ده اللي بيحصل معايا
يارب يارب يارب وتنولي اللي في بالك ياقمر:):):)
تحياتي
محمد عامر

هبة فاروق يقول...

اولا المدونه شكلها كده احلى
ثانيا سيبك من الصور وياريت البوستات تبقى كلها زى البوست ده حلو اننا نعبر عن كل اللى بنشعر بيه ونسجله لحظه بلحظه حلوه الفضفضه
ثالثا بقى وده الاهم اغيب شويه القيك بتحب جديد وكمان غرقان لشوشتك ههههه
حب ولا يهمك بس الاول اتأكد انها بتبادلك نفس الشعور ويارب دايما تبقى سعيد
تحياتى

Unknown يقول...

هبة فاروق

اولا : الحمد لله انها عجبتك وانا يهمني راحت المتابعين
ثانياً : حاضر عنيا الاتنين
ثالثا : شوفتي علشان بعد كدا مش تغيبي ولو طولتي المرة الجاية ممكن تلاقي بلاوي ههههههه
والله انا فيه حد اقنع فيا اني استني شوية لحد ما الامور تبقي ميه ميه واقول بقي بكل صراحه
يارب واتمنالك انتي كمان السعاده والصحة ان شاء الله
تحياتي يا هبه

somia'amin يقول...

يــــــــــارب تشوف التعليق وربنا يوفقكم وبتمنى لكم السعادة

صبح يقول...

على بركة الله ..هيهيههي هاتو الماذون يا ولاد هيهيههي

اعتقد انك داخل باعجاب على حب على هيام على حمى الغرام..

خدلك فيتامينات لتقوية جسمك للصدمات القادمة ,,

صدمات حلوة ان شاء الله...

عموما انا نصيحتي ليك انك لو بجد حاسس بحاجة نحيتها

و ده اللي باين..حاول تدرس امكانية جوازكم من ناحية استعدادك انت و هي ..
من ناحية امكانية الموضوع يتم او لا..

لانك لو مش حتمم الموضوع يبقى من الافضل قطع الموضوع من دلوقتي ,,

لاني مابحبش العلاقات اللي بتتبني على العميانيه و بعدين بعد مايبقى حب و هيام تتقطع العلاقة بسبب الواقع الاليم ..

ان معرفش ايه العيلة مش مناسبة هي تطلع مخطوبة لابن عمها من هما صغيرين,,

انت ممعكش تتجوز و الحجات دي يعني

و ربنا يوفق و يتمم ...

اتمنالك ككككككل التوفيييييق ياااارب

حنين محمد يقول...

صباح الغاردينيا أستاذ محمد
امممم ايه رأيك أعمل طبيبة مشاعر وأقولك أنت بتحب وبتحب بجنون بص ياأستاذي اما تبقى محتاج لوجودها وبتوحشك لما تغيب وصوتها بيبقى معزوفة هادية بتنام عليها وضحكة بتبقى الدنيا بحالها في حضنك وبتحس انك عاوز تحكي لها كل حاجة وتسمع منها كل حاجة دا يبقى ايه ؟؟
دا أكيد " حب "
امممم هي بقى العسل والقمر والي ضحكتها جنان معانا في بلوجر ههههههه
عموما بجد بجد فرحت لك مافيش احلى من الحب في الدنيا وربنا يفرح قلبك ويسعدك ونشوفك عريس :) "
؛؛
؛
لروحك عبق الغاردينيا
كانت هنا
reemaas

Unknown يقول...

somia'amin

انا شوفت التعليق وان شاء الله احاول اعمل اللي قولتي عليه
يارب واتمنالك التوفيق والسعاده
تحياتي

Unknown يقول...

صبح

ههههههههههه ماذون كدا علي طول
انا داخل باعجاب واعجاز وهيا حمي بجد والله وحاسس انه بيحصلي تهيأت
طالما صدمات حلوة تبقي حاجه كويسة ان شاء الله
ومن ناحية ابن عمها مش تقلقي لانه هيا مش مرتبطه وكنا بنتكلم عن الحاجات دي من تحت لتحت كدا
وربنا يسهل ان شاء الله
يارب , واتمنالك التوفيق والسعاده الدائمة ان شاء الله
تحياتي

Unknown يقول...

ريـــمـــاس

صباح النور ياريماس
انتي تعملي طبيبة مشاعر , ياريمو انتي المشاعر كلها ده انتي كيوبيد بلوجر , وطالما قولتي بحبها يبقي بحبها
ههههههه اه معانا في بلوجر
الله يخليكي ويارب وانتي تبقي اول الحاضريين في الفرح (وفارس معاكي طبعاً)
دومت دايماً بخير
تحياتي

Unknown يقول...

لله دركـ يـآ محمد :
حقـآ حكـآيـآتكـ مبهجه //، تصف من غير تكلف
سأدعو الله أن تكونوآ سويـآ أبد الآ بدين ..
تستحق ذآك أخي محمد
لنبضهـآ : أكاليل من آلورود
ولكـ : كل الشكرـر وآلتقدير

Mohamed Amer Mohamed © 2008 Por *Templates para Você*